明唔明白

媽: 好啦, 等媽媽打電話比思ee, 話比佢聽小柏掟砌圖, 叫佢唔好送比小柏喇.
B: 唔好呀!!
媽: 喂! 思ee呀, 小柏佢掟砌圖呀, 你唔好比禮物佢喇, 等小柏唔掟砌圖我就打電話話比你啦, bye bye. (扮接通) 小柏, 咁你仲掟唔掟呀?
B: 唔掟.
媽:好啦, 咁一陣媽媽見到你唔掟的話就打比思ee啦, 好唔好?
B: 好! 對唔住呀媽咪.

(幾分鐘後..........)
B: 打電話比思ee, 唔好送比媽媽呀,因為媽媽鬧小柏.
媽: (驚訝) ........

小柏, 媽媽仲以為佢知道並且明白. 原來仲要演習多幾次先得.

洗禮

媽: 小柏呀, 你知唔知道daddy媽媽好愛你架?
小柏: 知道!
媽: 咁你愛唔愛daddy呀?
小柏: 愛.
媽: 咁媽媽呢?
小柏: 媽媽都愛.
媽: 係呀....我地好愛小柏架, 因為天父愛小柏先架喎.
媽: 你愛唔愛天父呀?
小柏:愛.
媽: 咁, 天父住係你心入面, 好唔好呀?
小柏:好呀!
媽: 咁好啦, 天父住係你心入面, 我們祈禱的時候就可以比天父聽得清楚d喇.
小柏:好呀!
媽: 咁星期日你就要洗禮喇, 記住行出去的時候要安靜呀...

亞伯拉罕的信靠

媽咪: 今日講的故事係"亞伯拉罕的信靠"
媽咪: 亞伯拉罕
小柏: 亞伯拉罕
媽咪: 亞伯拉罕; 的信靠
小柏: 亞伯拉罕; 的信靠
媽咪: 的信靠
小柏: 的信靠...............

從講故事的過程, 再一次令媽咪閱讀"信心之父"的經文. 媽咪daddy最近聽到很多經濟不景的新聞, 知道很多人活在不安之中, 我們一同為他們祈禱, 求天父給他們一份信靠的心, 得平安.

媽咪

Daddy, 生日快樂!!

同你去lemans食飯, 成晚都令Daddy媽媽無啖好食, 皆因你四圍走, 四圍瞓, 顧住玩無食野, 最後當老闆娘送上蛋糕的時候.........小柏: Daddy, 生日快樂!! haha....見蛋糕就話生日快樂...

媽咪

重覆語句

小柏: 媽咪, 你番嚟喇....
媽咪: 係呀, 小柏.
*小柏: 媽咪, Daddy呢?
#媽咪: Daddy去咗搵醫生呀.
(*# x3)

最後打咗電話比Daddy同你傾咗一陣先肯罷休.......唔再問喇..

媽咪

培養優良品德

從圖書館借來一本書, 書名"培養優良品德". 起初同你講的時候都覺得例子幾好, 有"愛護花草樹木";"見人跌倒,不該嘲笑";"不要在客廳裡奔跑"等. 講講下發覺有些例子都幾得意, 只要改改當中的意思. 例如: 游泳池內不能小便, 弄壞別人東西要賠償...要考考媽咪喇..

另一本係"約拿的故事", 因為之前有本叫"大魚的晚餐"睇過, 而家見你大個咗所以借本內容比較似聖經的教導. 講的時候要七情上面令你專心聽, 因為你一見到自己識的圖畫就會即刻指住然後不停講, 例如: 魚, 紅色, 海底世界, 橙色....唔理媽咪. 所以講故事都真係唔容易, 又要回應, 又要接住講...求主幫助.

媽咪

媽媽病了!

一天阿仔7點左右起身入咗房叫我起床, 因為太眼瞓的原故....

小柏:媽媽起身呀. (拉住我隻手)
媽媽:小柏早晨. (眼都未開)
小柏:媽媽早晨. (面貼面)
媽媽:小柏早晨. (對眼無再開過)
小柏:媽媽起身啦..
媽媽:小柏, 媽媽想瞓多一陣呀.
小柏:媽媽..... 你........病呀?
媽媽:....係呀, 媽媽病呀.
小柏:媽媽...你....唔舒服呀?
媽媽:係呀, 媽媽唔舒服要休息呀.
小柏:bye bye 媽媽....(平平安安走出房)

最後可以瞓多1個鐘已經好好喇, 雖然都只係8點.

開學了!

2008年9月1日小柏第1天上堂,全家人都好緊張,連續3天都可以比家長陪同上堂,所以第1天媽咪Daddy兩個都陪你入學校, 第2日就係媽咪同婆婆,第3日都係媽咪Daddy兩個,見到你咁鍾意我地都好開心,第1日就唔怕羞出去同老師玩遊戲,有問有答,只係坐唔定...最定都係食茶點的時間喇....

電筒

沉晚用電筒照完沙發底找阿仔d玩具之後, 被阿仔發現電筒好好玩, 咁我地就一路睇閉幕, 一路周圍照.
教完你點樣開關後, 你咁好興奮地開開關關, 差d燈膽都消埋...原來熄哂燈照下照下真係幾好玩架...haha.

坐唔定

每憑出街或星期日上教會都好似看羊咁, 好怕你四圍走唔見咗, 都唔明白點解你唔見咗我地都唔驚!!?? 在街上, 在酒樓, 在教會, 真係唔知道你幾時先可以行定定, 坐定定..可唔可以呢日快d到呢?

禱

今晚開奶比阿仔, 當佢飲緊既時候我就唱首歌比佢聽下啦...

媽咪: 使我作你和平之子..在憎恨之處播下你的愛...在傷痕之處播下你寬恕...在懷疑之處播下信心..
突然之間, 小柏咬住奶咀的時候同我講: 媽咪, 好聽呀!
媽咪: 係呀! 好聽呀! (超開心, 想喊咁制)
小柏: 係呀, 好聽呀!

最後, 媽咪成晚repeat首歌直至佢飲完奶瞓著為止..

籐條?

星期六如常同小柏出街行下, 離遠見到711...
小柏: 媽咪,711雪糕呀! (指住對面7 eleven)
媽咪: 係呀, 咁我地過馬路入去睇下有無雪糕啦.
小柏: 好呀!
小柏: 媽咪, 雪糕呀, 711雪糕呀.(指住雪柜)
媽咪:係喎, hello, 711雪糕! (無打算買)
小柏: hello, 711雪糕! 媽咪, 籐條呀! (指住雪柜)
媽咪: 吓!? haha..籐條? (勁笑)
小柏: 係呀, 雪糕籐條呀!
媽咪: haha...勁笑!

諗諗吓我估計係阿仔同婆婆曾經到過711, 阿仔話要雪糕, 婆婆就話: 食籐條好無? 之後阿仔就將雪糕叫做籐條喇!

交學費

媽媽: 小柏, 你睇下, 係書包呀! (好興奮)
小柏: 係呀, 書包呀!
媽媽: "咩"係後面睇下靚唔靚先.
小柏: 好呀!
爸爸: 嘩! 好靚喎!! 小柏你睇下, 仲有杯杯同碗碗喎!
小柏: 係呀, 杯杯碗碗呀!
媽媽: 唔係碗碗呀daddy, 係盒盒呀!
小柏: daddy, 飲啦! (手拿住杯)
爸爸: 好呀, 多謝喎! 請媽媽飲啦.
小柏: 媽媽, 飲啦!
媽媽: 好呀, 多謝小柏. 你話唔駛客氣啦.
小柏: 唔駛客氣啦.
媽媽: 小柏, 你鍾唔鍾意番學呀.
小柏: 鍾意.
媽媽: 咁媽媽同你九月一日番學啦.
小柏: 好呀.
媽媽: 咁你記得要自己食飯喇, 唔好走來走去喇....

父親節快樂!

為配合6月16日的父親節,上星期四開始就已經教定小柏..

媽媽: 小柏講, daddy, 父親節快樂!
小柏: daddy, 父親節快樂!
婆婆: 唔係扶親, 係父親呀
小柏: 婆婆父親節..樂
婆婆: haha.唔係我呀, 關我咩事呀
小柏: 媽媽, 父親節快樂
媽媽: haha...係daddy, 父親節快樂呀
小柏: daddy, 父親節...快樂呀
媽媽: haha...係喎, 小柏啱喇!

最後星期六和日都講給不同的級數的爸爸聽, 大派用場.

2008父親節禮物, 一隻印有小柏出浴照的水杯+一個印有daddy媽媽的laser相架+一張小柏同媽媽畫的卡.

傻笑！

每晚都見到你傻笑，真係唔明白．．

唯有．．我倆都與您一同傻笑吧．

從客廳追逐到睡房，都足以令我們玩了一個晚上，還有與米奇共舞呢！

四川地震祈禱

媽媽: 小柏, 我地今晚為四川地震祈禱喇.
小柏:四川地震好慘呀!
Daddy:係呀, 我地一齊坐低祈禱啦, 好唔好呀?
小柏: 好呀! (終於都肯坐定定, 雙手合埋, 垂低頭, 對眼四圍望)
媽媽: 親愛的天父, 求你.....(20秒左右就 開始唔耐煩, 走落床)
媽媽: 奉主名求, 阿們! (刻意大聲講)
小柏: 阿們! (知道祈禱完就已經將隻手放在門鎖上準備開門)

2歲5個月大的小柏唔係好知道祈禱是什麼, 只是讓他有祈禱的學習, 將來每天都向天父禱告.

上班

媽媽: (著緊鞋之際) 小柏媽媽要上班喇
小柏: (攞自己對鞋) 媽媽, 鞋呀!
媽媽: 好啦, 叫婆婆同小柏著鞋然後送媽媽搭電梯啦.
小柏: (著完鞋) 媽媽, 抱呀!
媽媽: (抱住) 好喇小柏, bye bye媽媽啦, 媽媽上班喇
小柏: (向婆婆揮手)bye bye婆婆
媽媽: 哈哈...小柏媽媽要上班呀, 今晚見啦, bye bye媽媽啦
小柏: bye bye婆婆bye bye (攬得好實, 死都唔放)
爸爸: 小柏, 乖啦, 今晚daddy早d番見啦, bye bye (唔捨得)

最終喊住收場, 仲叫婆婆下午要帶你到公園或街市買菜...

無盡感恩

習慣了每星期五連續兩晚都會與小柏同睡, 你每次都會睡在我們中間, 然後用盡各樣辦法讓媽媽與你睡得更親近.
有時候你會用手將開我的手臂, 睡在我的腋下, 然後向上望著, 若我裝作睡著了的話, 你便會急忙地起身吻我的咀唇, 不斷地直至開眼為止, 很好笑...有時候你會睡在我的胸口上, 然後將我雙手放在你的小肚腩上, 緊緊地抱緊著你才入睡...有時候與daddy說說笑笑, 哼哼歌, 一會兒, 又進入夢鄉了...
有時候作簡單的祈禱, 一說"阿們", 你便在床上走來走去, 直至累透了才願意睡..哈哈.
多謝主給我們這小伙子..

小柏第一幅畫

間歇性與阿仔玩繪畫遊戲, 用我僅有的天份去畫一些簡單的物品..記得一次我簡單地用2個圓圈加1半圓形去畫一架車.

今晚, 奇怪的事件就發生喇...

媽咪: 小柏, 你畫咩呀?

小柏: 車車

媽咪: 哈哈, 係喎, 係車喎!!

婆婆: 等婆婆睇下! 係喎......車喎(有點猶疑..), 小柏好叻喎!

雖然唔係好似, 都足以令我興奮不已.

水痘針 (2歲或入學前注射)

若果接受水痘疫苗後仍出水痘，大多數會少一點，而且病情較輕微。水痘疫苗的有效期長達八至二十年。有效期過了，便需再接受注射。

阿仔星期二打完之後即晚發燒, 因此媽媽爸爸無得瞓, 觀察阿仔有無發高燒, 加上零晨佢瞓唔著要出廳玩..

阿仔, 媽媽好眼瞓呀!!!

第一次

因為戒尿片, 所以才會發生呢件事...

今晚同婆婆兩個撐枱腳, 當食飯的時候, 突然間發現地下有"舊"....

媽媽: 小柏, 你做咩痾ng ng唔出聲呀?
婆婆: 婆婆未教你坐係呢個桶度咩!? 你唔係狗仔喎, 唔可以架..!!
小柏: ......(唔知點算, 走去廁所好似平時一樣等人清潔pat pat)

即刻放低雙筷收拾呢個局面, 真係唔知好嬲定好笑..

膠紙遊戲

膠紙遊戲..小柏知道誰是真的, 誰是假的! 好好玩呀高儀EE..

小柏的午餐

紅菜頭+菠菜煮軟飯

紅菜頭含豐富的鉀、磷、鈣、鎂、碘、鐵等礦物質和多種不同的蘿蔔素，纖維高。它獨有的甜菜鹼，有助保持肝臟機能健康，具抗癌功效。

菠菜含有Ａ──Ｅ五種維他命，並有豐富的鐵質，能增加血色素。近代營養學家公認，菠菜確有補血功能。

婆婆不得了

婆婆不得了!!晚飯的時候突然問小柏．．．

婆婆: 小柏爺爺叫咩名呀?
小柏: 爺爺周....很節 (周慶治)
婆婆: 嫲嫲呢?
小柏: 嫲嫲黎......個芳 (黎國芬)
婆婆: Daddy呢?
小柏: Daddy, daddy, daddy..... (突然唱歌)
婆婆: Daddy周.......
小柏: 周永劍 (周偉健)
婆婆: 好野! 咁媽媽呢?
小柏: ......
婆婆:媽媽楊.........
小柏:任十明 (楊淑明)

整過過程令媽媽Daddy拍案叫絕, 婆婆真是不得了!!

瞓覺

媽: 小柏, 同婆婆瞓好唔好呀?
柏: 唔好呀..
媽: 咁, 同daddy瞓好唔好呀?
柏: 唔好呀..
媽: 咁, 同我瞓好唔好呀?
柏: No 呀..
媽: 哈....咁, 同媽咪瞓好唔好呀?
柏: 好呀媽咪瞓!

20/3 Daddy, daddy, daddy....

Daddy, daddy, daddy....

2008 1-3月

1月: 2歲生日, 學習戒紙尿片, 開始用句子表達, 時常載歌載舞..
2月: 記爸媽和祖父母的名字, 唱歌的時候將人名放入歌詞中..
3月: 注射了肺炎鏈球菌疫苗, 手足口病, 戒紙尿片有很大的進步..